سوال: رسالت مآبﷺکے بعد ان کے علوم کا حقیقی وارث کون ہوا ہے؟ اگر آپ صحابہ کرام کا نام لیں گے تو اس وقت ان میں بھی اختلاف رہا۔ اگر آپ علما کرام کا نام لیں۔ ان میں آج بھی اختلاف ہے۔ اگر آپ اولیاء کرام کا نام نہیں تو ہر ولی کی طریقت جدا نظر آتی ہے۔ اگر آپ یہ کہیں کہ ان سب کی منزل ایک ہے صرف راستے جدا جدا ہیں تو میری نظر میں قابل قبول نہیں کیونکہ صراط مستقیم صرف ایک ہوتا ہے؟

حضرت امیر محمد اکرام اعوانؒ(محفل شیخ سے انتحاب)
جواب: علمی وراثت کے بارے میں ایک اصولی بات سمجھ لیں ۔ نبی کریم ﷺ اور امت کے در میان صحابہ کرام ایک واسطہ ہیں۔ نبی کریم ﷺنے جو دولت بانٹی اور لٹائی ہے وہ امت کو صحابہ کرام کے ذریعے ہی پہنچی ۔ اگر یہ درمیانی واسطہ قابل اعتبار نہ ہو تو سارا دین ہی قابل اعتبار نہیں رہتا۔ اب سوال یہ پیدا ہوتا ہے کہ اس درمیانی واسطہ کو کیا اللہ کریم نے اور رسول کریم ﷺ نے قابل اعتبار قرار دیا ہے اور اگر قرار دیا ہے تو اس میں شک کرنا کسی طرح مناسب نہیں ۔ قرآن کریم کی سو سے زیادہ آیات اس امر پر شاہد ہیں کہ صحابہ قابل اعتبار ہی نہیں بلکہ نبی کریم ﷺ کی عطا کردہ دولت کے امین ہیں اور اسے مخلوق تک پہنچانا ان کے فرائض میں داخل ہے اور نبی کریم ﷺ کا ارشاد ہے جو آپ نے اپنے حجتہ الوداع کے خطبے کے دوران سارے صحابہ کو مخاطب کر کے فرمایا کہ جو موجود ہیں وہ ان تک پہنچائیں جو موجود نہیں۔ یعنی حضور اکرم ﷺ نے سارے صحابہ کو دینی علوم کا وارث قرار دیا اور امت کو اس کی ضمانت دی کہ أَصْحَابِي كَالنُّجُومِ بِأَيِّهِمُ اِقْتَدَيْتُمْ اِهْتَدَيْتُمْ کہ میرے صحابہ  ستاروں کی مانند ہیں۔ جس کا دامن تھام لو گے تمھیں منزل مقصود تک پہنچا دے گا ۔ اب یہ فیصلہ امت کو خود کرتا ہے کہ وہ اللہ و رسول ﷺ کی بات پر اعتماد کرے یا عام انسانوں کی رائے کو اپنائے۔